Arbeidet med oppgradering av snøproduksjonsanlegget er i gang!

Jølster Skisenter har i haust starta arbeidet med nytt høgdebasseng som skal forbetre arbeidet med snøproduksjon. Dette prosjektet er delfinansiert av Sparebankstiftinga, Sparebanken Vest og Jølster Kraftfond, og vi er takksame for deira støtte!

Arbeidet vil markere eit viktig skritt mot ein meir bærekraftig og energieffektiv snøproduksjon. Ved å bygge ny dam vil vi kunne redusere behovet for å pumpe vatn frå elva Jølstra som ligg fleire hundre høgdemeter lågare i terrenget. Dette vil ikkje berre gjere prosessen meir effektiv, men også bidra til ei betre utnytting av ressursane våre.

Kvifor er kunstsnø så viktig?

Kunstsnø er snø som er laga av eit snøproduksjonsanlegg som består av eit stasjonært eller flyttbart pumpe- og rørsystem som saman med snøkanoner kan lage snø. Frå vasskjelda renn vatnet inn til to pumper på Støylen som pressar det ut på anlegget med høgt trykk, og når temperaturen er kald nok kan vi produsere kunstsnø. Kunstsnø gjev eit godt og solid grunnlag i skibakken, og lagar ein god sole for natursnø som seinare kjem frå oven. Snøproduksjon er og med på å sikre tidleg opning av skianlegget og kan bidra til ein lang skisesong gjennom ein vinter som ofte kan vere ustabil her på vestlandet. Kunstsnø er difor med på å gje gjestande eit betre tilbod og den sikrar aktivitet for idretten.

Vi har frå før eit høgdebasseng på omlag 600 moh. Dammen vert i snøproduksjons-perodar tappa heilt ned og vi har i desse periodane henta vatn frå elva Jølstra. Denne prosessen er energikrevjande og fører dessutan til varmegang i vatnet som igjen fører til mindre effektiv snøproduksjon.

Våren 2024 gjekk vi igang med å planlegge nytt høgdebasseng og ny fortrykkspumpe som skal forsyne skibakken med vatn med naturleg trykk. Med ny fortrykkspumpe krest det mykje mindre straum for å oppnå same mengde og trykk som i dag. Med ny dam har vi meir enn dobla mengde tilgang til vatn. Prosjektet er kostnadskrevjande med bl.a. graving, rørsystem og ny pumpe.

Vi har vore heldige å få med Sparebankstiftinga, Sparebanken Vest og Jølster Kraftfond på spleiselaget. Dette resulterer i ein vinter med ein betydelig meir energieffektiv snøproduksjon.